Indiako hegoaldea

Azpikontinente baten gorabeherak

Indiako mitologiaren arabera, hinduismoaren Vishnu jainkoa hamaika aldiz berpiztu eta hamaika era ezberdinetara etorri izan da lurrera. Berpizte horietako bakoitzari "avatar" (euskaraz “gorabehera”) deitzen zaio. Modu berean agertzen zaigu Indiako kontinentea, hamaika paisaia eta kultur ezberdinen bidez.

Iparraldea ezagutzen dutenei, Indiako hegoaldeak bestelako paisaiak eta denbora eskainiko dizkie, askoz lasaiago bizi diren herrixkak eta pertsonak. Baina ibilbide hau Indiako azpikontinentearekiko lehen harremana denentzat, India zaharraren aniztasuna eta bertako ondare historikoa, naturala, artistiko eta kulturala aipatu beharko genituzke.

Mumbai erraldoitik abiatuta, trena hartu eta goiko lurretan dagoen Godavari haranera egingo dugu jauzi, bertako Ajanta eta Ellora kobazuloak bisitatzeko. Ondoren beherantz egingo dugu, hegoalderantz, Wenster Ghats mendikatearen eta Deccan goi-lautadaren arteko lautada zabaletan zehar, azpikontinenteko historia aberats honen lekuko ikusgarri ugari gordetzen dituen eskualde zabalean zehar: Bijapur-eko musulmanen ondarea, Badamiko chalukya etniaren arkitektura, Vijayanagara inperioaren hondakin arkeologiko ikusgarriak, Halebid eta Belur hirietako hoysala erregeen eraikinak... Tropikoko atea den eta sandalo-loreen usaina duen Mysore hirira iritsi arte.

Ondoren kostaldean dagoen Malabar eskualdeko Cananor hirira jaitsiko gara, espezia, palmondo eta hondartzen paisaietako Indiara: Kerala eta Tamil Nadu, nortasun handiko eta urte askotako kultura duten bi estatu. Kanal lasaiak, arrantzaleen herrixkak, paisaia tropikalak, hiri kaotikoetan eraikitako tenplu ikusgarriak, gure ibilbidearen azken tartea, lasaiagoa, markatuko duten paisaiak.