[Turkiako hegoaldea] Liziako kostaldea

Ibilaldi bat historian zehar

Zenbait historialariren ustez, Liziako Liga historiako lehendabiziko erakunde demokratikoa izan zen. Hainbat estatu-hirik politikoki bat egin zuten, eta ondorioz ekonomia oparoa, goi-mailako kultur garapena eta lurraldearen defentsari eustea lortu zuten.

Turkiako Mediterraneoko kostaldean kokatua, eskualdean itsasoa, mendiak eta klima leuna edukitzeak asko lagundu zion Liziari merkataritzaren eta kulturaren arloetan garapen oparoa izaten. Estrategikoki kokatua, hainbat herrik (hititak, grekoak, persiarrak, lizioak, itsasoko tribuak, erromatarrak, piratak…) aztarna utzi zuten eskualdean.

Eta aztarna horien lekuko dira Lizian egun ikus daitezkeen hondakin arkeologiko ugariak, gehienak toki ederretan kokatuak.

Antaliatik abiatuko gara, autobus txiki batean, hegoalderantz, kostalderantz, eta bidean arkeologia gunerik garrantzitsuenak bisitatuko ditugu (Perge, Aspendos, Arikanda edo Xhantos, besteak beste), baita kostaldeko tokirik ederrenak ere. 

Eta bidaiaren kontraste gisa, Greziako Kastelorizo uhartea, Liziako kostaldetik oso gertu dagoena.