Galapagoak

Itsasoz eta oinez "Sorgindutako uhartetean"

"Sorgindutako uharteak", "Lurraren artxiboak", "Eboluzioaren altxorra" edo "Noeren Pazifikoko ontzia" dira, besteak beste, Galapago uharteek historian zehar jaso izan dituzten izenetako batzuk. Itsas hondoko sumendien eraginez sortuak, Galapagoetako kala, arrakala, mendi eta sumendietatik itsaso eta kontinente guztietako konkistatzaileak, baleazaleak, piratak, zientzialariak eta marinelak igaro dira. Zalantzarik gabe, bisitaririk ospetsuena Charles Darwin izan zen, uharteak eta uharteetako fauna bitxia (apoarmatuak edo Galapagoetako dortokak, iguanak, hegazti bitxiak...) ezagutu ostean Espezieen Eboluzioari buruzko Teoria idatzi baitzuen.

Gure bidaia prestatzeko orduan hurbileko harremana eta ibilbide atsegin bat elkartu nahi izan ditugu, uharte batetik bestera joateko txalupa arinak edo bizkorrak erabiliz eta tokirik interesgarrienak eta batzuetan ez hain ohikoak hurbiletik ezagutzeko oinezko ibilbideak eginez. San Cristobal uhartea, Santa Cruz uhartea, Bartolome uhartea, Seymour eta Bachas uharteak, Isabela uhartea, Tintoreras uhartea. Galapagoetako dortoka erraldoiak, iguanak, itsas lehoiak, pinguinoak, marrazoak, flamenkoak eta milaka hegazti. Hondartzak, urmaelak, basoak eta mendiak, labazko kanalak eta fumarolak, kraterrak eta sumendiak (guk El Junco, Sierra Negra eta Chico bisitatu nahi ditugu). Bestetik, herrixka txikiak bisitatuko ditugu, eta haietan bizi direnak, baita Darwin Estazio Zientifikoa eta antzinako espetxe bat ere.