Japonia

Tradizioaren eta etorkizunaren artean

Japoniari buruz hitz egiterakoan jendeak badu herrialde horri buruzko irudi bat, mende askotako tradizioak eta etorkizuneko gizarte futurista lotzen dituen irudia hain zuzen ere. Eta egia esan gaurko Japonia tradizioaren eta modernitatearen arteko nahaste edo lotura perfektua da. Aldi berean herrialde horretako naturaren edertasunaren bila nahiz ondare arkitektonikoa ikustera hurbiltzen direnak erakartzeko gaitasuna du Japoniak. Eta horretan Japoniak behin eta berriro harritu eta ekarriko gaitu, zalantzarik gabe, gure kulturarekin alderatuz gero erabat ezberdina, guztiz bestelakoa den kulturara hurreratzeko aukera ematen digulako. #Honshu uhartearen inguruko ibilbideak Japoniako aurpegiak banan-banan ezagutzeko aukera emango digu, baita herrialde honen iraganaz eta etorkizunaz harritzekoa ere. Tokio liluragarritik hasiko gara, egungo japoniar gizartearen kontrasteak ezagutzeko aproposa; hortik Nikkoko baso arteko mendixketan barrena egingo dugu, Japoniako santutegi ederrenetako batzuk biltzen dituzten paisaien artean. Gero uhartearen erdi aldera joateko asmoa daukagu, "Japoniako Alpeetara” hain zuzen ere: naturaren lilura, herri txikietako bizimodua eta antzinako hiri probintzialen xarma, Shogun eta samuraien garaiak gogora ekarriko dizkigutenak. #Honshuko beste aldera iritsi eta gero, Japoniako Itsasoaren hegalean, hegoalderantz egingo dugu berriro ere, Japoniako hiriburu kulturalera eta Japoniako iraganaren edertasunaz gozatzeko tokirik onenera: Kiotora. Trena hartuko dugu kostaldeko bidea egiteko, Hiroshimaraino. Bertan jaurti zen lehen bonba atomikoa eta horren oroimenez eraikitako eraikinak sarraskiaren garrantziaz jabetzeko aukera emango digu. Eta itzuli aurretik Tokio hiria bisitatuko dugu, “jaiotzen ari den eguzkiaren” herrialdeari hurrengora arte esateko.