Turkiako ekialdea

Anatoliako mugak

Anatoliako penintsula kulturen igarobide eta arragoa izan da mendeetan zehar, bereziki ekialdeko muturrean, non turkiar, kurdu, arabiar, georgiar edo armeniar herri hain ezberdinek bat egiten duten.

Bidaia honetan, lurralde ezezagun hori arakatuko dugu, eta parekorik ez duen ondare historiko bat aurkituko dugu, non erlijioak, antzinako erresumak eta milaka urteko kulturak nahasten diren: asiriarrak, arabiarrak, kaldearrak, turkiarrak, kurduak, georgiarrak, armeniarrak, persiarrak, greziarrak... guztiak pasatu ziren hemendik eta beren arrastoa utzi zuten.

Gure ibilbidea arabiarren eragin argia duen hego-ekialdetik hasiko dugu, Eufrates eta Tigris ibaien ertzetako Mesopotamiako lautadak hasten diren tokian, eta, ondoren, Van aintzira inguratzen duten lurralde kurdu menditsuetan barneratuko gara. Iparralderantz jarraituko dugu antzinako armeniar eta georgiar erresumen hondakinak bisitatuz, antzinako Trebisondan amaitu arte, Itsaso Beltzaren kostalde berdean.

Bidaia honek hainbat gauza ezberdin eskainiko dizkigu eta  behin baino gehiagotan harritu egingo gaitu, paisaien ikuspegitik, egun gutxitan zeharkatuko ditugulako basamortu-itxurako paisaiak, estepako eremuak, mendi malkartsuz eta baso eremu zabalez inguratutako haranak, baita ikuspegi historiko, kultural eta artistikotik ere.