Galapagoak

Itsasoz eta oinez
"Sorgindutako uharteetan”

"Sorgindutako uharteak", "Lurraren artxiboak", "Eboluzioaren altxorra" edo "Noeren Pazifikoko ontzia" dira, besteak beste, Galapago uharteek historian zehar jaso izan dituzten izenetako batzuk. Denek Kolonen Artxipelagoaren naturaren arloko berezitasunak ekartzen dizkigute gogora. Kolonen Artxipelagoa da, hain zuzen ere, lur-ekuatorean inguruan eta lehorretik (Ekuadorretik) mila kilometrora kokatutako sumendi jatorriko 13 uharte handi, sei uharte txiki eta ehundik gorako uhartetxo edo harkaitzen izen ofiziala. Ofizialki, Ekuadorreko uharteak dira. Itsas hondoko sumendien eraginez sortuak, Galapagoetako kala, arrakala, mendi eta sumendietatik itsaso eta kontinente guztietako konkistatzaileak, baleazaleak, piratak, zientzialariak eta marinelak igaro dira. Zalantzarik gabe, bisitaririk ospetsuena Charles Darwin izan zen, uharteak eta uharteetako fauna bitxia ezagutu ostean Espezieen Eboluzioari buruzko Teoria idatzi baitzuen. 

    Hiru irleetako hotel erosoetan lo egiteko lekua hartuta, ibilbide atsegin eta bizia proposatzen dugu, uharte batetik bestera joateko txalupa arinak edo bizkorrak erabiliz eta tokirik interesgarrienak eta batzuetan ez hain ohikoak hurbiletik ezagutzeko oinezko ibilbideak eginez. San Cristobal uhartea, Santa Cruz uhartea, Bartolome uhartea, Seymour eta Bachas uharteak, Isabela uhartea, Tintoreras uhartea. Galapagoetako dortoka erraldoiak, iguanak, itsas lehoiak, pinguinoak, marrazoak, flamenkoak eta milaka hegazti. Hondartzak, urmaelak, basoak eta mendiak, labazko kanalak eta fumarolak, kraterrak eta sumendiak (guk El Junco, Sierra Negra eta Chico bisitatu nahi ditugu). Bestetik, herrixka txikiak bisitatuko ditugu, eta haietan bizi direnak, baita Darwin Estazio Zientifikoa eta antzinako espetxe bat ere.