Kamerun
Alantika mendietako bidezidorretan barrena

Antropologo errugabearen arrastoaren atzetik

Banoak Kamerungo lurretan orain arte egin dituen ibilbideetan bi antropologoren nolabaiteko laguntza izan dugu: Lluís Mallart katalanarena eta Nigel Barley ingelesarena, eta horrelaxe dago jasota gure ibilbide-orriak ixten dituzten bibliografietan. #Aurtengo Gabonetarako, eta sasoi hori Alantikako basoetako bidezidorretan barrena ibiltzeko sasoirik onena dela aprobetxatuz, Antropologo errugabea liburuaren pasaiak ezagutzeko erabakia hartu dugu. Eta oinez egingo dugu, paisaiak eta herrixkak gertu-gertutik bisitatzeko. #Kamerungo mendikatea Gineako golkoaren ondoan dago eta hainbat mendigune biltzen ditu Txad lakutik gertu dauden Mandara mendietaraino. Mendikate honetako iparraldeko tartea Fumbina eskualde historikoaren benetako bizkarrezurra izan zen. #XIX. mendearen hasieran ful (baita fula edo fulani izenez ezaguna ere) etniaren iraultzaren ondorioz Fumbia eskualdean estatu islamikoa sortu zen, Adamawako emirerria, eta eskualde horretan etnia horren nagusitasuna ezarri zen. Fulen nagusitasunetik eta islamismotik ihesi, tribu batzuek mendietan bilatu zuten babesa. Lurralde malkartsu eta gogorraren babesean, kirdi izeneko kulturek ((fulen hizkuntzak hitz horrek paganoa esan nahi du) euren sinesmen animista zaharrei eutsi ahal izan diete. #Horrelakoxea da Alantika mendietan bizi diren dowayo eta koma etnien herrialdea, antzina sumendiz beteriko lurraldea eta egun 1.800 metroko altueran bizimodu tradizionalari eusten dioten jendeen bizilekua.