Udazkena Japonian

Badirudi jende guztiak duela Japoniari buruzko aldez aurretiko ideia bat, antzinako tradizioen eta geisha misteriotsuen mundu baten oroitzapenetik gizarte futurista baten imajinario edo iruditeriaraino doan ideia. Eta egia esan Japonia gaur egun bada tradizio eta modernitatearen arteko gurutzaketa perfektu bat.

Naturaz gozatzea edo bertako ondare arkitektonikoari begira egoten disfrutatzea helburu dutenak zein bertako gastronomia dastatu edota herrialde horretako alderdirik ezezagunak ezagutu nahi dituztenak, den-denak geratuko dira herrialde honetaz enamoratuta. Zeren eta, gertatu ohi dena da herrialde honetaz informazio asko eduki arren ere, Japoniak uneoro harritu ohi gaituela eta antzinako sustraiei ondo eusten jakin izan duen kultura bitxia, bakarra, erakusten digula.

Bidaia honetan Japoniako erdialdeko eta hegoaldeko hiri nagusiak (Tokio, Kioto edo Hiroshima, besteak beste) eta landa-giroko beste toki interesgarri batzuk eta oinezko ibilbide batzuk elkartzen ahalegindu gara, Fuji mendira, Japoniar Alpeetara, Yamanobenomichira edota Kumano Kodes erromes bidera iristeko aukera emango digutena. 

Baina bidaia honen erakargarritasunik handiena Japoniako basoen kolore ikusgarria izango da. Japonian naturak aparteko tokia betetzen du, oso toki berezia, eta baso zabalak ditu nonahi. Zalantzarik gabe, baso horiek ikusteko unerik egokiena zuhaitzak hostoak aldatzen hasten direnean eta paisaiak horitik gorri bizira bitarteko kolore-sinfonia zabal batez koloreztatzen direnean da. Ibilbide hau egiteko azaroa hautatu dugu, basoak beren unerik onenean ikusteko eta lorategiak eta tenpluak parekorik ez duten kolorez apaindurik ikusi eta haiez bete-betean gozatzeko.