Mongolia

Larre eta zaldien lurra

Gengis Khanek, Mongoliako konkistatzaile nagusia izan zenak, tribu nomadak batu eta gerrarako bidean jarri zituen, eta Europako ateetaraino hedatu zen inperio mitikoa sortu zuen, Asiako Erdialdea, Pertsia, Ekialde Hurbila, Txina… okupatuz, Indoko haran zaharrean ere sartu-irtenak egin zituelarik. Nekez aurki dezakegu liburuetan Mongoliari buruzko Gengis Khanen aurretiko aipamenik eta Gengis Khanen inperioa desegin ondoren ere berriro desagertu zen historiako liburuetatik, duela gutxira arte.# Egungo Mongolia bisitatuz konturatuko gara Gengis Khanen garaiak oraindik bizirik daudela mongoliarren oroitzapenetan, bizitzan eta ohituretan, baina... noiz arte? Nomaden herria, etengabeko mugimenduan beti, ganaduarentzako larre onenen bila edota negua igarotzeko bailara epelenen bila. Abeltzaintzatik bizi dira gehien bat: yakak, gameluak, zaldiak, elur-oreinak… , eta horietatik ateratzen dituzte janariak (haragia eta esnea), berokiak, garraioa… bizitzeko behar duten guztia beren ger edo etxebizitza mugikorretan sartuta. Eta beste inon ez bezala, hemen zaldia da nagusi, bizitzeko ezinbestekoa, eta mongoliarren bizimoduan eta kulturan oso uztartua. Mongoliarrak, gogorrak, zakarrak, borrokalariak… baina aldi berean abegikorrak eta lagunen lagunak, agian bizi diren lurreko klimaren antzekoak, muturrekoak.# Gure ibilbidean Gobiko basamortutik erdiko lurretako estepa, baso eta lur bolkanikoetarantz abiatuko gara, iparraldean Khovsgol laku handiarekin topo egin arte, siberiar paisaiaren erdi-erdian. Basamortua, belarrezko itsaso zabal bat, mendiak, lakuak, basoak… bertan bizi direnen eta denboraren joan-etorrien lekuko isilak, ibilbide handi honen erronkari eutsiko ote dion bisitariari so. Natura bere gordintasunean eta espazio zabal-zabalen handitasuna maite dituztenei begira pentsatutako bidaia, Mongolian ez baitago ia hiri handirik.#

Oharra: Bilboko eta Bartzelonatik irteerak aurreko egunean izango dira.